Jaji Mutungi, fanya haya kurejesha amani Arusha

Desemba 6, mwaka huu Msajili wa Vyama vya Siasa, Jaji Francis Mutungi aliandika historia kwa kuitisha mkutano wa hadhara wa amani jijini Arusha ukishirikisha wadau wa siasa, dini na kijamii Arusha isipokuwa Chadema walioususia dakika za mwisho.

Katika sababu zao kadhaa, Chadema wanadai kuchukizwa na propaganda zilizosambazwa mitaani vyombo vya chama tawala, kwamba Chadema sasa maji shingo na hivyo wangetumia mkutano huo kutangaza kumtambua Meya wa Arusha.

Sikusudii kujadili ushiriki wa wadau katika mkutano huo, bali ninalenga kujadili nia, lengo, kusudi, dhamira njema na njia sahihi anayopaswa kufuata Jaji Mutungi katika harakati za kutafuta na kurejesha amani Arusha.

Kabla ya kufikia hatua ya kuitisha mkutano wa hadhara wa wadau, Jaji Mutungi alipaswa kujua kiini, sababu na washiriki wa migogoro

Msajili na timu yake wanapaswa kujifunza, kuelewa na kubaini kiini na sababu za migogoro, kujua wahusika wa vurugu, malengo na njia wanazotumia kuyafanikisha.

Anapaswa kujua faida na hasara kijamii, kisiasa na kiuchumi ya migogoro na vurugu hizo kwa makundi yote.

Kwa uchache, madhara yanayoonekana wazi ni pamoja na vifo, ulemavu na kudorora kwa uchumi.

Baada ya kubaini yote hayo hapo juu, Msajili atafute njia sahihi, bora na ya mwafaka ya kuponya madhara na vidonda ndugu vya mgogoro huo.

Njia sahihi ni majadiliano ya kina yasiyo na hila yanayopaswa kusimamiwa na watu waadilifu, wenye nia na dhamira njema, wanaoheshimika na kukubalika katika jamii na makundi yote.

Hawa wanaweza kuwa viongozi wa dini, wanasiasa au wa kijamii ambao hawajachafuka wala kujihusisha kwa njia moja au nyingine na migogoro hii. Watu wa aina hii wapo wengi Arusha na sehemu mbalimbali nchini na wanajulikana kwa majina na sura.

Kabla ya kuwaleta hadharani mbele ya umma, Ofisi ya Msajili iratibu vikao na mikutano ya faragha kati kundi moja moja na wasuluhishi ili kukubaliana kiini, sababu, madhara au faida ya migogoro na vurugu na njia sahihi ya kurejesha amani Arusha.

Majadiliano haya yanastahili kuanzia katika ngazi ya kundi moja moja kabla ya kujumuisha makundi yote au kwenye mkutano wa hadhara.

Wahusika wa migogoro na vurugu Arusha wanaopaswa kujadiliana na kufikia makubaliano ni pamoja na vyama vya CCM, Chadema, Jeshi la Polisi na viongozi wa Serikali ya Wilaya na Mkoa wa Arusha ambao hutumia ukada wa CCM kukibeba chama hicho dhidi ya Chadema.

Msigano wa kisiasa kati ya Chadema kwa upande mmoja na CCM ikishirikiana na Ofisi ya Mkuu wa Wilaya na Mkoa pamoja na polisi na vyombo vingine vya dola kwa upande mwingine, ndiyo chanzo cha migogoro na vurugu Arusha.

Mgogoro binafsi, wa kitaasisi au kimasilahi kati ya Mkuu wa Mkoa wa Arusha, Magessa Mulongo na mbunge wa Arusha, Godbless Lema nao unastahili kujadiliwa na kupatiwa ufumbuzi kabla ya wawili hawa kujitokeza hadharani mbele ya umma kuhubiri amani.

Bila kujua kiini, wahusika, hasara (faida), kwa umma na njia sahihi ya kutibu vidonda vinavyotokana na migogoro na vurugu za Arusha, kamwe hatutarejesha amani Arusha.

Maandamano na mikutano ya hadhara ya kuhubiri amani hayatatuletea amani ya kweli Arusha. Amani itapatikana tu pale wahusika watapojitambua, kujua tofauti zao, kuyaweka hadharani, kuyajadili, kila upande kukubali kupata na kukosa (win win process), kusamehe na kurejea msemo wa “yaliyopita si ndwele, tugange yajayo”

+255 766 434 354

Chanzo;Mwananchi.