TaCRI yahamasisha kilimo cha kahawa

TAASISI ya Utafiti wa Kahawa Nchini (TaCRI), imezitaka halmashauri za wilaya nchini kushirikiana na taasisi hiyo kuwawezesha wakulima wa kahawa kuendesha kilimo bora cha kisasa kitakachowaongezea kipato.

Mtafiti wa Usambazaji Teknolojia na Mafunzo wa TaCRI, Jeremiah Magesa, alitoa kauli hiyo juzi wakati akizindua kampeni ya ugawaji miche ya kahawa katika halmashauri ya wilaya ya Moshi, mkoani Kilimanjaro.

Alisema wakati umefika sasa kwa halmashauri za wilaya nchini kuwekeza katika zao la kahawa, ili kuongeza kipato cha halmashauri kutokana na ushuru wa kahawa unaolipwa na wanunuzi sanjari na kuwakomboa wakulima kutoka kwenye lindi la umaskini.

Magesa aliipongeza Halmashauri ya Wilaya ya Moshi kwa kuonyesha mfano kwa kununua miche bora ya kahawa 45,000 yenye thamani ya sh milion 16, kwa lengo la kuigawanya kwa wakulima kama njia moja ya kufufua zao hilo.

Alizitaka halmashauri nyingine ambazo nazo wakulima wake wanajishughulisha na kilimo cha kahawa kuiga mfano huo sanjari na kuendeleza vitalu vya uzalishaji miche bora ya kahawa kwenye maeneo yao.

Awali, Ofisa Kilimo wa Halmashauri ya Wilaya ya Moshi, Chikira Mcharo, alisema wamedhamiria kushirikiana na TaCRI ili kufufua zao la kahawa ambalo miaka ya nyuma lilijulikana kama mkombozi wa wakulima mkoani Kilimanjaro.

Alisema kuwa miche hiyo waliyoinunua wataigawanya kwenye vijiji 26 vilivyoko kwenye kata 26, lengo likiwa ni kuhakikisha wanahamasisha kilimo cha zao hilo.

Chanzo;Tanzania Daima