Bodi yatakiwa kuwaadhibu watendaji wabovu

SERIKALI imeitaka Bodi ya Wataalamu wa Ununuzi na Ugavi Nchini (PSPTB) kuwachukulia hatua za kinidhamu wanachama wake watakobainika kuisababishia hasara serikali kwa kuingia mikataba mibovu ya ununuzi ambayo haina tija kwa taifa.

Akizungumza kwenye mkutano mkuu wa nne uliohudhuriwa na wataalamu zaidi ya 500 wa tasnia ya manunuzi na ugani mkoani hapa mwishoni mwa wiki, Naibu Waziri wa Fedha, Janeth Mbene, alisema uchumi wa nchi, umekuwa ukiyumba kutokana na usimamizi mbovu wa manunuzi.

“Wataalamu msikubali hata kidogo kuchafua sifa nzuri ya taaluma yenu..na kama kuna mtu anakulazimisha kufanya uovu huo kataa.. ukikubali ni wajibu wa bodi kukuwajibisha,” alisema.

Alisema asilimia 70 ya bajeti ya serikali kila mwaka huenda kwenye manunuzi, hali inayoonyesha umuhimu wa sekta hiyo, hivyo ni lazima manunuzi yafanyike kwa kuzingatia maslahi ya taifa.

Mbene alitoa wito kwa PSPTB kuongeza kasi katika usimamizi wa maadili kwa wanachama wake, ili pamoja na mambo mengine kuleta ustawi na kuepusha upotevu wa fedha za umma kwa manunuzi ya bidhaa zisizokidhi viwango.

Mkurugenzi Mtendaji wa PSPTB, Clemence Tesha, alisema tangu kuanzishwa kwa bodi hiyo mwaka 2007 kabla ya kukasimu kwa iliyokuwa NBMM hadi sasa imezalisha wahitimu wa kada mbalimbali wapatao 23,182, sawa na asilimia 47 ya mahitaji yote ya wataalamu hao kwa taifa.

Chanzo;Tanzania Daima