Wasomi: Mtengamano EAC legelege

 

UTENGAMANO miongoni mwa nchi wanachama  wa  Jumuia ya Afrika Mashariki (EAC) umeelezwa kuwa legelege huku ukishindwa kuwashirikisha wananchi, wataalamu na vyama vya siasa katika mchakato wa uundwaji wake.

Aidha ili kuufanya uwe imara imeshauriwa nchi wanachama kupanua wigo wa kushirikiana kwenye sekta mbalimbali ikiwemo ile ya elimu kwa kuhakikisha wanahuisha na kufanya mifumo yao ya elimu ili ifanane.

Hayo yalielezwa juzi kwa nyakati tofauti na watoa mada kwenye kongamano kuu la mwaka la asasi za kirai nchini kujadili fursa na changamoto za utengamano wa EAC uliojumuisha washiriki 25 toka nchi wanachama wa EAC.

Mhadhiri wa Chuo Kikuu cha Dar es Salaam, Bashiru Ally, alisema mtengamano wa EAC ni legelege, kwani unaegemea masuala dhaifu kama sarafu, masuala ya kisiasa zaidi jambo alilodai hayawezi kuufanya ukawa imara kwani ni wa hiari zaidi.

Alisema mtengamano madhubuti ni ule unaotokana na wananchi na sababu za lazima kama vile masuala ya kiusalama ambao huchangia kuundwa serikali moja.

Alisema  mtengamano wa EAC ni teketeke, kwani unawategemea marais wa nchi wanachama pekee kuendelea kuwepo huku ukishindwa kuwashirikisha wananchi, wataalamu hata vyama vya siasa toka nchi wanachama.

Dk. Kitila Mkumbo alisema nchi wanachama zinaweza kuongeza mtengamano kwa kuamua kuweka viwango vya elimu sawa kwenye nchi zote tano.

Alisema kuwa hiyo itawezesha wanafunzi wa nchi wanachama kuweza kuhamia kusoma nchi yoyote bila matatizo jambo alilodai kuwa ni afya kwa mtengamano.

Dk. Kitila alisema kwenye masuala ya lugha ingewezekana walimu wa Kiswahili kutoka Tanzania wakaenda kufundisha nchi nyingine huku Rwanda na Burundi ikisambaza wale wa Kifaransa na Kenya na Uganda ikatoa walimu wa Kiingereza, jambo alilosema kuwa lingesaidia kuongeza kasi ya mtengamano.

Alishauri nchi wanachama wakarejesha Chuo Kikuu cha Afrika Mashariki kilichozinduliwa na Mwalimu Nyerere mwaka 1963, ili kiendelee kuzalisha wataalamu.

Naye mshiriki wa kongamano hilo kutoka Tanzania, Moses Adam Allan, alisema lazima mfumo wa elimu  uliopo ubadilishwe, ili uwawezeshe wahitimu kukuza uchumi wa ukanda huu tofauti na sasa ambapo wahitimu wengi wanarandaranda kutafuta ajira.

Chanzo;Tanzania Daima