POLISI WAUA WATATU KATIKA JARIBIO LA KUPORA FEDHA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Kamanda wa Polisi wa Mkoa wa Arusha, Liberatus Sabas

Watu watatu wanaodaiwa kuwa ni majambazi, wameuawa na polisi mkoani hapa wakidaiwa kutaka kupora fedha katika kampuni ya Arusha Ceramic Centre inayojishughulisha na utengenezaji wa vigae.
Katika jaribio hilo la uporaji, majambazi hao walitumia silaha aina ya shotgun namba A 947514 M – Pump Action iliyotengenezwa Marekani, pamoja na risasi tatu.
Kamanda wa Polisi wa Mkoa wa Arusha, Liberatus Sabas, alisema tukio hilo lilitokea juzi saa 10:20 jioni jirani na kiwanda cha bia cha TBL eneo la Njiro jijini hapa.
Alisema watu hao ambao bado hawajatambuliwa majina yao wanakadiriwa kuwa na umri wa miaka 25 hadi 30, wanadaiwa kutaka kupora zaidi ya Sh. milioni 100.
Polisi walidai kupata habari hizo kutoka kwa raia wema kuhusu jaribio la uporaji na wakaanza kuwafuatilia kuanzia maeneo ya Unga Ltd.
Alisema majambazi hao walikuwa wakitumia gari aina ya Toyota Corolla lenye namba za usajili T 762 CWE.
Kamanda Sabas, alisema majambazi hao waliwashtukia polisi na baada ya muda wawili kati yao walianza kuwafyatulia risasi.
Alisema polisi walifanikiwa kuwaua majambazi wawili hapo hapo na mwingine alifariki baada ya kufikishwa Hospitali ya Mkoa ya Mount Meru.
Miili ya marehemu imehifadhiwa katika hospitali hiyo ikisubiri ndugu na jamaa kuwatambua.

CHANZO: NIPASHE