SHULE MAREKANI,TANZANIA ZASHIRIKIANA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399

 

WANAFUNZI wa shule za sekondari kutoka jamii za Kimasai wamepata fursa ya kuongeza taaluma na stadi za maisha baada ya Shule ya Sekondari ya Orkeeswa kushirikiana na shule ya kimataifa ya Groton ya nchini Marekani.

Mwalimu Mkuu wa shule hiyo iliyopo Monduli, Arusha inayosomesha watoto kutoka familia duni, Yusuph Mollel, alisema mpango huo umewezesha wanafunzi kwenda Marekani kujifunza katika shule ya Groton kwa miezi mitatu.

“Ushirikiano huu umezaa matunda, wanafunzi wanaporudi wanakuwa na ari ya kusoma na hata kufanyakazi za umma wanapokuwa nyumbani… wamejitolea kwenda shule za jirani na kuwafundisha wanafunzi masomo mbalimbali ikiwemo Kingereza,” alisema Mollel.

Akizungumza na waandishi wa habari, Mkurugenzi wa idara ya ushauri nasaha kutoka shule ya Groton ambaye  yupo nchini na wanafunzi  kutoka Marekani, Megan Harlan alisema mpango huo umetoa fursa kwa   wanafunzi wote kufahamu masuala mbalimba ya kitaaluma.

“Wanafunzi wangu wamefurahia utamaduni wa kimasai na kufahamu kwamba kuna tofauti kati ya utamaduni wa kimarekani na Tanzania… hii isingekuwa rahisi bila kuwepo kwa mpango huu,” alisema.

Sophie Baker ni mwanafunzi wa  Groton alisema amejifunza mambo mengi kuhusu ukarimu wa watanzania hasa wamasai na kamwe hataisahau Tanzania na watu wake.

Naye mwanafunzi wa kidato  cha tano wa shule ya Orkeeswa aliyekwenda Marekani, Florah Tipapurwa  alisema mfumo wa elimu ya Marekani ni wa juu zaidi ikilinganishwa na Tanzania likiwemo tatizo la ukosefu vitabu, madawati na waalimu wa kutosha

Chanzo;Tanzani Daima