Wahadzabe walia na hujuma za wanaume

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

  Katika jamii nyingi, hasa za mijini, ni kawaida wanawake na wanaume kushirikiana katika shughuli mbalimbali za kiuchumi.

Lakini hali hii ni tofauti kwa Wanawake wa jamii za pembezoni za wafugaji; Wamasai, Wabaebeig na Wahadzabe ambao wanaume wao badala ya kuwaunga mkono katika miradi yao, wamekuwa wakiwahujumu.

Baadhi ya wanaume hawa wamefikia hatua ya kupora mifugo, ya vikundi vya akina mama hawa, ili wasiendelee kiuchumi.

Wanawake wa jamii hizo, wakizungumza na Mwananchi katika mkutano uliokuwa umeandaliwa na mtandao wa mashirika ya wafugaji na waokota matunda (PINGOS Forums), wanasema miradi yao imekufa baada ya kuhujumiwa na waume zao.

Amina Msendekwa, mfugaji kutoka jamii ya Wamasai wa Kijiji cha Wami Sokoine wilayani Mvomelo, anasema mradi wao wa kunenepesha mifugo katika kijiji chao umekwama baada ya wanaume wao kuiba mifugo kabla ya mauzo ili wasiendelee na biashara hiyo.

Anasema walianzisha mradi huo baada ya kupata hamasa na elimu ya kutosha, hivyo wakawa wananunua ndama wadogo na kuwafuga kwa kuwanenepesha na baadaye kujipanga kuuza ng’ombe wakubwa.

“Mradi wetu ulikuwa mzuri sana. Tulinenepesha mifugo, lakini tulipopanga kuuza baada ya kukamilika, tulianza kuibiwa kidogo kidogo,” anasema.

Kutokana na majukumu yao kama wanawake, iliwalazimu kuomba msaada kwa wanaume kuwasaidia kuwasaka ng’ombe waliokuwa wanaibiwa, lakini cha ajabu walikuwa hawapewi ushirikiano na baadaye walibaini ni njama za waume zao.

“kila tulipokuwa tukipanga kupeleka ng’ombe mnadani, waliibiwa na wanaume zetu na jitihada za kurejeshewa zilikwama hadi sasa mradi umekufa,” anasema Msendekwa.

Paulina Tipapu, mkazi wa Loliondo, anasema licha ya mtandao wa mashirika yasiyo ya kiserikali wilaya ya Ngorongoro wa Nngonet kuwapa mbuzi watano wa kisasa, mradi huo umekwamishwa na wanaume.

Tipapu anasema wanaume wamekuwa wakichukuwa mbuzi bila idhini yao na kwenda kuwauza na hata pale wanapokwenda wao kuuza wanaume wamekuwa waking’ang’ania fedha.

“Tumeshindwa kuendeleza mradi kama tulivyotarajia baada ya waume zetu kutuhujumu. Sasa tunakaa kubuni miradi mingine,” anasema Tipapu.

Caroline Kandus, afisa jinsia wa miradi mtambuka wa Pingos Forums, anasema kutokana na baadhi ya wanaume katika jamii hizo kuhujumu miradi ya wanawake, wameanza kutoa elimu ya miradi mbadala ili kuwakomboa.

“Ni kweli akina mama wa jamii hizo wanakabiliwa na changamoto nyingi katika miradi ndio ndio maana hapa tupo mashirika kadhaa kuwapa elimu mbadala katika miradi mingine kama ya Saccos, ufugaji wa nyuki na shanga ambayo wanaume hawatahusika,” anasema.

Anasema katika mipango mipya wanakusudia kujikita kuwasaidia akina mama hao ili wawe na miradi ambayo haitahitaji msaada mkubwa wa wanaume kama miradi ya kusuka shanga na kufuga nyuki.

“Tumeanza kutoa elimu na baadaye tutaandaa maandiko na kupeleka sehemu mbalimbali ili akina mama hawa wapate elimu na mitaji,” anasema

Hata hivyo, alisema kwa kiasi kikubwa wanawake wa jamii hizo wameanza kuelewa umuhimu wa kuwa na miradi yao na sasa mikakati imeanza kutoa elimu kwa wanaume, ili kutokwamisha miradi ya akina mama.

Ndeko Ndeko, ambaye anatoka jamii ya Wahadzabe, anasema jamii zao zinaweza kubadilika kama wakipatiwa miradi ambayo wana uwezo nayo.

“Ng’ombe hatuwezi kwa kuwa tutawala tu. Hatuwezi kukaa na njaa wakati tuna wanyama, lakini tukisaidiwa miradi ya nyuki katika bonde letu la Yaeda Chini nadhani tunaweza kubadilika,” anasema Ndeko.

Afisa tawala wa Wilaya ya Simanjiro, Juma Ali Juma anasema Serikali inatambua changomoto hizo na sasa mkakati umeanza kuwekwa katika miradi shirikishi baina ya akina mama, waume zao na mashirika yasiyo ya kiserikali.

“Kutokana na tafiti inaonekana akina mama hawa, wanaweza kufanya miradi mbali mbali ya kimaendeleo lakini lazima tuwe na mbinu za kuwashirikisha waume zao kutambua miradi hiyo na kuwapa elimu ya kuwazuia wasiwaingilie,”anasema Alli.

Hata hivyo, anasema anaimani kukiwa na miradi shirikishi maisha ya akina mama hao wa jamii za pembezoni, wataweza kubadili mifumo ya maisha yao.
Chanzo:Mwananchi