WAFANYABIASHARA WAKUBWA KUONGEZEKA HADI 2000,000

MAMLAKA ya Mapato Tanzania (TRA), inatarajia kuongeza kiwango cha wafanyabiashara wakubwa kutoka 23,000 wa sasa hadi kufikia 200,000, ili kupandisha kiwango cha mapato cha sasa. Hayo yalisemwa mwishoni mwa wiki na Mkurugenzi wa Huduma na Elimu Wa TRA, Richard Kayombo wakati akizungumza na waandishi wa vyombo mbalimbali vya habari Jijini Arusha.

Alikuwa akielezea umuhimu wa matumizi ya mashine kielektroniki (EFDs) za TRA kwa wafanyabiashara.

Alisema kuna umuhimu wa kuongeza idadi ya wafanyabiashara hao hadi kufikia kiwango hicho, ili kuongeza mapato ya taifa zaidi ya sasa.

"Hii mashine inasaidia kujenga nchi kwa kulipa kodi na inaondoa usumbufu wa makadirio ya mauzo yao, kwani hii inakadiria moja kwa moja, lakini pia kila anayenunua baada ya mauzo yake ataona faida zake," alisema Kayombo.

Alisema kwa sasa ugomvi walionao mkubwa ni makadirio ya gharama halisi, wanazotakiwa kutoa wafanyabiashara kwa TRA na wengi hudai wanabambikiwa gharma kubwa, tofauti na mauzo halisi.

"Sasa tukaona bora tulete kifaa hiki ambacho hakina kuchakachua kwa njia yoyote ile, inasema kweli unachouza ndicho kinachotolewa, ila hapa muhimu kila mtu anaponunua bidhaa yoyote mdai risiti, sababu huko tuendako utatozwa faini ya shilingi milioni moja kama hujadai risiti,"alisema.

Kayombo alisema pia ili kuleta uhamasishaji wa utoaji risiti na wanunuzi kudai risiti, muda si mrefu wanatarajia kuleta shindano litakaloshindaniwa kwa tiketi za zawadi nono.

"Tunataka kufanya hivi ili kuhamasisha watu kudai risiti na mfanyabiashara kutoa risiti ili mwisho wa siku wote tupate faida,"alisema.

Alisisitiza kuwa sio busara kuacha kudai risiti, kwa sababu unapoiacha unamnufaisha mfanyabiashara husika na wewe mnunuzi unakosa haki yako kimsingi, kwani bidhaa unayonunua tayari imekatwa kodi.

Chanzo;Habari Leo

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.