Watanzania watakiwa kuwa macho na wawekezaji

WATANZANIA wametahadharishwa kuwa makini katika kuingia ubia na wawekezaji wa kampuni za kutoka nje ya nchi, kwa kuwa wengi wao huwa na ajenda binafsi za kunufaika wao na kuwaacha wazawa wakiendelea kuwa maskini.

Tahadhari hiyo ilitolewa mjini hapa jana na Martin Kariongi, mkurugenzi  wa Kampuni inayojihusisha na miradi ya kusaidia jamii ya wafugaji wa Kimasai katika wilaya za Longido, Simanjiro na Same ya Ilaramatak Olkonorei, ambayo pamoja na miradi ya kijamii pia inamiliki redio ya kijamii ya ORS.

Akizungumza na waandishi wa habari, Kariongi alisema amelazimika kutoa angalizo hilo kwa Watanzania na serikali kwa ujumla kwa kuwa ni sehemu ya wahanga wa jambo hilo kutokana na mgogoro uliopo sasa baina yake na wabia wenza katika mjumuiko wa Kampuni ya Omasi Group ambayo inamiliki ranchi ya jamii ya Ormoti iliyopo Terati – Simanjiro, viwanda vitano vya kusindika maziwa, machinjio ya kisasa Terati, uzalishaji wa umeme na maji na kiwanda cha mkaa.

Baada ya kufanikiwa kuanzisha makampuni hayo kupitia ubia wa pamoja na kupata fedha kutoka taasisi ya kijamii ya kutoa misaada ya nchini Uholnzi ya SHGW kama misaada ya kuimarisha miradi hiyo ya kijamii, hali ilianza kubadilika kwa wazawa kuonekana ni mizigo kwa Waholanzi hao na kuanza kuanzisha makampuni ndani ya kampuni kwa siri ili kujimilikisha miradi hiyo.

“Hayo yote yanatokea kutokana na unyonge wetu sisi Watanzania na ukarimu kwa kudhani kuwa wawekezaji wote wanakuja hapa nchini kwa lengo la kusaidia jamii kumbe sivyo, wengine wanakuja kwa malengo maalumu ya kujinufaisha kupitia mgongo wa wazawa,’’ alisema Kariongi.

Alisema ameshangazwa kuona katika vyombo vya habari matangazo yakitolewa ya kusitisha ufadhili katika makampuni hayo yanayogharamiwa na kwa gharama kubwa na kupigia debe kampuni zao binafsi ambazo walianzisha kwa mgongo wa ubia na kupata misamaha ya kodi.

Alifafanua kama hali imefikia hapo ni bora sasa serikali ikafuatilia suala hili kwa kina ili kama sheria inaruhusu basi wabia hawa ambao wamejitenga watozwe kodi stahiki kulingana na sheria za nchi na wasiachwe kunufaika. 

Chanzo;Tanzania Daima