Wahimu watakiwa kutengeneza fursa

MKUU wa Chuo cha Uhasibu, Profesa Johannes Monyo, amewataka wahitimu kuacha kusubiri kuajiriwa na badala yake kuwa wabunifu wa kutosha wa kutengeneza au kutafuta fursa.

Profesa Monyo alitoa wito huo hivi karibuni wakati alipozungumza na wahitimu wa shahada ya uzamili.

Alisema itashangaza kukuta wasomi kama wao wakikaa vijiweni wakilalamikia ukosefu wa ajira nchini bila kutumia elimu aliyoipata kubuni njia sahihi za kumuwezesha kupata fursa za ajira.

Alisema chuo hicho hivi sasa kimeendelea kujitanua ambapo tayari kimefungua tawi lake jijini Dar es Salaam na kina mpango wa kufungua tawi kama hilo jijini Mwanza ili kusaidia idadi kubwa ya Watanzania kupata elimu.

Naye Mkuu wa Kitivo cha Uhandisi na Kompyuta, Chuo Kikuu cha Coventry cha Uingereza (CU), Barbara Howell, amewataka wasomi wa Tanzania kutumia kwa vitendo elimu waliyoipata waweze kuleta mabadiliko katika maeneo yao.

Howell, ambaye ndiye aliwatunukia shahada wahitimu hao kwa niaba ya Chuo cha Coventry, ambacho kina ushirikiano na Chuo cha Uhasibu katika kuendesha mafunzo hayo kwa ngazi ya shahada ya uzamili aliwasihi kulisaidia taifa la Tanzania kupitia elimu waliyoipata.

Chanzo;Tanzania Daima