Maonesho ya vito yaingiza bil. 7/-

MAONESHO ya madini ya vito na bidhaa za usonara yaliyofanyika jijini Arusha hivi karibuni na kuwashirikisha wafanyabiashara wakubwa duniani yameingiza dola  milioni 4.397 za Marekani (sh bilioni 6.9) kama mauzo ya madini hayo.

Kamishna Msaidizi wa Madini Kanda ya Kaskazini, Benjamini Mchwampaka, alibainisha hayo mjini hapa jana na kusema pia serikali ilifanikiwa kupata sh milioni 227.4 kama malipo ya mrahaba, pamoja na kuingiza nchini na kutoa madini hayo imefanikiwa kupata zaidi ya dola 200 za Marekani.

Maonesho ya mwaka jana yaliingiza dola milioni 3.8 ambayo ni sawa na sh bilioni 6.

“Maonesho hayo yamefanikiwa kwa kiasi kikubwa kwani wafanyabishara wa Kitanzania wameweza kupata fursa ya kukutana na wafanyabiashara wakubwa wa madini duniani,” alisema Mchwampaka.

Alisema wafanyabishara wa madini kutoka Tanzania na Afrika kwa jumla walikuwa 180, wakiwakilisha makampuni 54 toka nchi 10 ambazo ni Tanzania, Kenya, DRC, Madagasca, Msumbiji, Zambia, Afrika Kusini, Nigeria na Uganda.

Kutoka nchi za Ulaya na Asia, walikuwepo wanunuzi 160 kutoka nchi 24 duniani ambazo ni Marekani, Italia, Ufaransa, Ujerumani Australia, Ugiriki, China, Thailand na Austria.

Hata hivyo Kamishna Mchwampaka alisema maonesho ya tatu yatafanyika jijini Arusha, kati ya Novemba 18 hadi 20 mwakani. Maonesho hayo yanaandaliwa na serikali kwa kushirikiana na Chama cha Wauza Madini Tanzania (Tamida).

Chanzo;Tanzania Daima