Askari FFU kizimbani kwa wizi

WASHITAKIWA  watano akiwamo askari wa Kikosi cha Kutuliza Ghasia (FFU) jana wamefikishwa katika Mahakama ya Hakimu Mkazi mkoani hapa wakikabiliwa na kesi ya wizi wa sh milioni 228, mali ya Kampuni ya ujenzi ya Dott Service Ltd. Tukio hilo lililotokea Oktoba 29, mwaka huu, majira ya saa 4 asubuhi katika maungio ya barabara za Arusha na Old Boma Manispaa ya Moshi, wakati Mkurugenzi wa kampuni hiyo, Shuresh Bab (45) yeye na wafanyakazi wengine wakipeleka fedha hizo katika Benki ya NMB, Tawi la Mandela baada ya kuzitoa Benki ya Standard Charted. Wakili wa Serikali, Oscar Ngole, alimweleza Hakimu Mkazi Mfawidhi wa Mahakama hiyo, Simon Kobelo, kwamba watuhumiwa wanaokabiliwa na kesi hiyo ni Francis Mushi (27) maarufu kama Master ambaye ni mtunza stoo wa Kampuni ya ujenzi ya Dott Service na mkazi wa Kibosho-Longuo A. Aliwataja wengine kuwa ni  Wenceslaus Mambo (36) ambaye ni dereva wa Kampuni ya ujenzi ya Dott na mkazi wa Kariwa chini pamoja na askari polisi mwenye namba Ex. G. 1674 PC Jackson Nzengule (28) maarufu kama King, mkazi wa Mabogini. Wengine  ni Philbert Lyimo (33) maarufu kama Kadogoo, dereva wa bodaboda na mkazi wa Longuo ‘A’ katika Manispaa ya Moshi na Jackson Brayson, maarufu kama Rema, mfanyabiashara wa njia panda, Wilaya ya Moshi. Wakili Ngole, akiwasomea mashitaka yao watuhumiwa hao, alisema kwenye kosa la kwanza, siku na tarehe isiyojulikana nchini Tanzania, watuhumiwa hao walikula njama ya kutenda kosa kinyume na kifungu cha 384 cha kanuni ya adhabu, sura ya 16 iliyofanyiwa marekebisho mwaka 2002. Ngole aliieleza mahakama kuwa kosa la pili ni la wizi wa kutumia silaha, kinyume cha kifungu cha 287A cha kanuni ya adhabu ya mwaka 2002 ambayo imefanyiwa marekebisho katika sheria namba nne (4) ya mwaka 2004 ambapo washitakiwa walitumia silaha aina ya bastola kuwatishia maofisa wa Kampuni ya ujenzi ya Dott ili kufanikisha wizi huo. Kesi hiyo imeahirishwa hadi Novemba 22, mwaka huu. Chanzo;Tanzania Daima