Tumieni nishati mbadala kwa uzalishaji - Mulongo

MKUU wa Mkoa wa Arusha, Magesa Mulongo, amewataka Watanzania kujenga utamaduni wa kutumia nishati mbadala kwa uzalishaji badala ya kutegemea serikali kusambaza umeme kutoka katika gridi ya taifa.

Mulongo alitoa kauli hiyo jana kwenye hafla ya kumkaribisha mteja wa 1,000, aliyefungiwa mtambo wa nyumbani wa umeme wa jua wa Kampuni ya Mobisol kutoka Ujerumani iliyofanyika mkoani hapa.

Alisema serikali kwa kushirikiana na wadau mbalimbali kupitia Wakala wa Umeme Vijijini (REA) wameweka malengo kuhakikisha sehemu zote zilizo nje ya gridi ya taifa zinapata nishati ya umeme.

“Ninawapongeza Mobisol kwa kushirikiana na Vodacom kwa kuwawezesha Watanzania hasa wa maeneo ya vijijini kupata nishati ya umeme. Ninatoa wito kwa Watanzania kutumia fursa hii kupata nishati kuliko kutegemea serikali ifikishe umeme katika maeneo yao kutoka katika gridi ya taifa,” alisema.

Ofisa Mahusiano wa REA, Jaina Msuya, alisema wakala huyo amefurahia ushirikiano huo ambao umewezesha Watanzania zaidi kupata nishati ya umeme, hivyo wao kama wakala wako tayari kushirikiana na wadau mbalimbali kwa kutoa ruzuku ambazo zitawawezesha kufikisha umeme vijijini.

“REA ni moja ya taasisi za serikali zinazotekeleza mpango wa serikali wa matokeo makubwa, hivyo mafanikio haya ni moja ya mafanikio ya utekelezaji wa mpango huo,” alisema Jaina.

Mteja wa 1,000 wa Mobisol, Catherine Peter, alieleza kufurahi kumiliki mtambo wake unaotumia nishati ya umeme wa jua.

Chanzo: Tanzania Daima