TANAPA kuendeshwa kijeshi

SHIRIKA la Hifadhi za Taifa (TANAPA) limeamua kubadili mfumo wake wa utendaji kazi kutoka wa kiraia na kuwa wa kijeshi kwa watumishi wote ili kuongeza umakini katika kukabiliana na ujangili.

Tayari bodi ya mamlaka hiyo, imeishapitisha uamuzi huo na kuuwasilisha serikalini ili kupata ridhaa. Sasa watumishi wote watalazimika kupata mafunzo rasmi ya kijeshi ili kuendelea kuwepo kazini.

Akizungumza na waandishi wa habari jana, meneja mahusiano wa Tanapa, Pascal Shelutete alisema uamuzi huo umetokana na changamoto kubwa iliyopo sasa ya ujangili katika hifadhi za taifa.

Alisema katika jitihada za kukabiliana na ujangili ndani ya hifadhi za taifa, kwa kipindi cha miezi miwili ya Aprili na Juni, askari wa Tanapa waliweza kukamata silaha za moto 85 toka kwa majangili na 795 za kienyeji.

Alitaja aina ya silaha zilizokamatwa kuwa ni civilian rifle saba, magobore 60, automatic rifle tano na short-gun 13. Pia waliweza kutegua nyaya za kutegea wanyama 25,422.

Shelutete alisema licha ya kubadili mfumo wa watumishi, hata mfumo wa ajira sasa wameubadili. Wameanza kuajiri askari kutoka Jehi la Kujenga Taifa (JKT) na Chuo cha Wanyamopori cha Pasiansi, Mwanza.

Alisema kuwa wanaofaulu katika usaili wanakwenda katika mafunzo maalumu ya kisasa kukabiliana na ujangili.

Kwa mujibu wa Shelutete, kwa kuanzia tayari kuna askari 100 waliofuzu usaili wa awali, na wanapelekwa katika mafunzo maalumu ya mbinu za medani yatakayofanyika katika Hifadhi ya Taifa ya Katavi na watakaofuzu, wataajiriwa rasmi na shirika hilo.

Aliongeza kuwa wapo baadhi ya watumishi wa Tanapa wanashirikiana na majangili, na kwamba uchunguzi umeanza kwa wale wote waliotajwa, na ikithibitika hatua ya kwanza itakuwa ni kufukuzwa kazi na baadaye kufikishwa katika vyombo vya sheria.

Alisema hali ya kudhibiti ujangili inakuwa ngumu kutokana na soko kubwa la vipusa lililoko katika nchi za China, Thailand na Malaysia. Kwamba wafanyabiashara wakubwa hutoa ufadhili maalumu kufanikisha ujangili ndani ya hifadhi.

Shelutete aliongeza kuwa wameanzisha kikosi maalumu kilichopata mafunzo ya kisasa ya mbinu za medani chenye askari 40 kwa ajili ya kukabiliana na matukio ya uhalifu.

Alisema tayari kikosi hicho kimeanza kutoa mafanikio. Kwa miezi sita toka kimeanza kazi, hakuna tukio lililotokea katika hifadhi ya Ruaha ambako kimeanzia.

Katika hifadhi za Tarangire na Ziwa Manyara, alisema kwa miezi sita sasa hakujaripotiwa taarifa za kuuawa kwa tembo.

Chanzo: Tanzania Daima