Mitambo ya Symbion matatani kwa kutoa moshi wenye kemikali

SHIRIKA la Ugavi wa Umeme nchini (TANESCO) limeitaka Kampuni ya kuchakata umeme ya Symbion Power (T) Ltd kuhakikisha inarekebisha mitambo yao iliyopo Njiro jijini hapa ili kudhibiti sauti na moshi unaodaiwa kuwa na kemikali.

Tayari wakazi wa eneo hilo wamelalamikia mitambo hiyo wakidai kuwa inahatarishia afya zao, na hofu ya kupata ugonjwa wa saratani kutokana na moshi mkubwa mweusi unaotanda angani sanjari na sauti na mitetemeko inayosababisha nyufa kwenye nyumba zao.

Kaimu Mkurugenzi wa TANESCO, Felchesmi Mramba aliyasema hayo alipokuwa akijibu maswali ya waandishi wa habari mara baada ya kufunguliwa kwa mkutano wa muungano wa wasambazaji na wazalishaji wa vifaa vya umeme wa nchi za kusini mwa Afrika (PIESA).

Alisema kuwa mkataba wa Symbion na TANESCO wa kuzalisha umeme wa dharura ambao alidai kuwa gharama yake ni kubwa, unatazamiwa kumalizika mwezi Oktoba mwakani, hivyo akawaomba wananchi hao kuwa wavumilivu kwa kipindi hicho.

Mramba alisema kuwa baada ya kipindi hicho mitambo hiyo itaondolewa kwenye eneo hilo huku akisisitiza kuwa tayari alishaongea na uongozi wa kampuni hiyo ili kuhakikisha wanairekebisha ili kuwapunguzia kero wananchi.

Awali wananchi hao kutoka vitalu B, C, na D walishapeleka malalamiko yao kwenye taasisi mbalimbali ikiwemo Baraza la Taifa la Uhifadhi wa Mazingira (NEMC), wakilalamikia athari za kimazingira zinazosababishwa na mitambo hiyo inayozalisha megawati 66 iliyowekwa kwenye kitalu C bila wao kushirikishwa.

Wanadai kuwa eneo hilo lililokuwa likitumiwa na TANESCO kusambaza umeme lilibadilishwa matumizi na kuanza kuzalisha umeme bila kuwashirikisha wala kufanyiwa tathmini ya mazingira kama sheria inavyotaka.

Malalamiko ya wananchi hao yanaungwa mkono na majibu ya NEMC ambao pamoja na mambo mengine waliwaeleza wananchi hao kuwa tathmini ya kimazingira ilikuwa haijafanywa kwenye eneo hilo kama sheria inavyoagiza.

Akizungumzia mkutano huo, Mramba ambaye ndiye mwenyekiti wa PIESA, alisema kuwa ni muhimu kwani utawawezesha washiriki kubadilishana uzoefu wa kitaalamu kupitia tafiti zilizofanywa ili kurahisisha zoezi la uzalishaji, usambazaji na ugavi wa umeme.

Naibu Waziri wa Nishati na Madini, Steven Masele alisema kuwa wamejipanga kuongeza mtandao wa umeme hapa nchini kutoka asilimia 21 za sasa hadi asilimia 30 ifikapo 2015.

“Asilimia saba kati ya 21 ya mtandao wa umeme hapa nchini uko vijijini, tumeamua kuweka nguvu kubwa ya kusambaza umeme vijijini kupitia wakala wa usambazaji umeme vijijini (REA). Hadi kufikia mwakani tutakuwa tumevifikia vijiji 1,600 na vile vile vilivyoko mjini vitaunganishwa na TANESCO,” alisisitiza Masele.

Chanzo: Tanzania Daima