TFF YAOKOA MASHINDANO YA ROLLINGSTONE

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

SHIRIKISHO la Soka Tanzania (TFF), limejitosa kuokoa mashindano ya vijana ukanda wa maziwa makuu ambayo yalikuwa katika hatihati ya kufanyika na sasa waratibu Rollingstone Sports Academy ya mjini hapa chini ya mwamvuli wa mtandao wa taasisi za soka la vijana Afrika Mashariki na Kati (ECAYFA) watayaendesha kwa kushirikiana na shirikisho hilo.

Mashindano hayo ya wazi, hufanyika kila mwaka mkoani Arusha na mwaka huu yatafanyika jijini Dar es Salaam mwezi ujao na kushirikisha timu za vijana chini ya miaka 20 na 14 kutoka Burundi, Rwanda, Kenya, Zanzibar na Jamhuri ya Kidemokrasia ya Kongo (DRC).

Akizungumza na Tanzania Daima, Mkurugenzi wa Rollingstone Football Academy, Ally Mtumwa, alisema mashindano hayo yalikuwa katika hatihati ya kufanyika, baada ya TFF kuchelewa kutoa kibali cha kuendesha, kwani taasisi hiyo iliandika barua ya kuomba tangu Februari, lakini hawakupatiwa kwa wakati.

Mtumwa alisema kutokana na kuchelewa kwa kibali hicho, walishindwa kufanya maandalizi ikiwa ni pamoja na kutafuta wafadhili na kualika timu, hususani zile zinazotoka nje ya nchi, hali iliyosababisha kufikiria kuyasogeza mbele au kutofanyika kabisa.

Aliongeza kuwa baada ya kufuatilia, TFF walikiri kupokea barua hiyo na kusema sababu zilizochangia kutofanyiwa kazi ni pilikapilika za kuhama ofisi kupisha ujenzi wa ofisi za Karume.

Alisema lakini kwa kujua umuhimu na ukubwa wa mashindano hayo, waliamua yafanyike kwa ushirikiano wa pamoja kwa sharti la kufanyika jijini Dar es Salaam ili waweze kushuhudia.

Hii itakuwa mara ya pili kwa mashindano hayo ya 14 kufanyika nje ya Arusha, kwani mwaka 2012 yalifanyika nchini Burundi na utakuwa mwanzo wa kuzunguka katika mikoa na nchi mbalimbali ambazo zitakuwa tayari kuandaa na kukidhi vigezo.

Chanzo;Tanzania Daima