WAUMINI WA KKKT WAMKATAA MCHUNGAJI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

BAADHI ya waumini wa Kanisa la Kiinjili la Kilutheri nchini (KKKT), Usharika wa Endamarariek, Jimbo la Karatu, mkoani Arusha, mwishoni mwa wiki walimkataa Mchungaji mpya wa usharika huo, John Moyo.
Hali hiyo ilijitokeza baada ya mchungaji wa zamani, Costatini Panga kufukuzwa na Dayosisi ya Kaskazini ambapo uongozi wa jimbo hilo ukiongozwa na Mkuu wa Jimbo, mchungaji Samwel Slaa, ulifika katika usharika huo ili kumtambulisha Mchungaji Moyo.
Hata hivyo, waumini waliokuwepo kanisani zaidi ya 400 walisusia ibada ya utambulisho na kutoka nje wakipinga kupelekewa mchungaji mpya bila ridhaa yao.
Baada ya waumini hao kutoka nje, uongozi huo uliendelea na ibada kwa saa mbili ambayo ilihudhuriwa na waumini wasiozidi 10 na baada ya ibada hiyo kumalizika, waumini waliotoka waliingia kanisani ili kuendelea na maombi na kufanya majadiliano.
 Akizungumzia mgogoro huo, muumini mmoja wa kanisa hilo ambaye hakutaka jina lake liandikwe gazetini, aliulalamikia uongozi wa Jimbo kufanya ibada kwa nguvu waumini wengine wakiwa nje.
Alisema uongozi huo kwa kushirikiana na Dayosisi ya Kaskazini,umekuwa ukiwadharau waumini badala ya kuwasikiliza katika malalamiko yao ya muda mrefu.
"Sisi kama washirika wa Endamarariek , tumefikia uamuzi wa kumkataa Mchungaji Moyo kwa sababu tayari tumeanza mchakato wa kufungua kesi mahakamani tukipinga uamuzi wa Jimbo na Dayosisi kufukuzwa Mchungaji Panga bila sababu za msingi," alisema.
Mkuu wa Jimbo hilo Mchungaji Slaa alipoulizwa kuhusu mgogoro huo, alisema wapo baadhi ya waumini ambao ndio wanaosababisha mgogoro huo hivyo wapo katika vikao vya ndani ili kuwajibu.