Mgomo wa daladala watikisa Arusha

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 Mgomo wa mabasi yanayofanya safari zake kati ya Moshi na Arusha, jana ulitikisa miji hiyo kwa saa nane mfululizo, huku baadhi ya daladala za katikati ya Mji wa Moshi nazo zikishiriki mgomo huo.

Polisi wa kutuliza ghasia (FFU), wakiwa na magari sita, huku wamejihami kwa silaha yakiwamo mabomu ya machozi, walionekana wakizunguka mitaani na kupeperusha bendera nyekundu.

Kituo Kikuu cha Mabasi ya Moshi-Arusha na miji mingine, jana saa 2:00 asubuhi hadi saa 7:00 mchana, kilizingirwa na polisi na hakuna basi lililoingia kituoni wala kutoka.

Mbali na kituo hicho kuwekewa ulinzi mkali, FFU, wakipeperusha bendera nyekundu, waliweka kambi Kituo Kikuu cha Polisi, Moshi tayari kudhibiti vurugu kama zingetokea.

Kutokana na mgomo huo, baadhi ya abiria kutoka maeneo mbalimbali walilazimika kutembea kwa miguu kwenda kwenye shughuli zao mbalimbali.

Mgomo huo ulianza saa 12:00 asubuhi ukishirikisha mabasi mengi kabla ya kuanza kupungua nguvu saa 3:00 asubuhi baada ya baadhi ya wamiliki kulegeza msimamo.

Hata hivyo, ahueni hiyo ilikuwa ya muda mfupi tu, kwani saa moja baadaye mabasi karibu yote yaliingia katika mgomo.

Wakati hali ikiwa hivyo, madereva wa pikipiki maarufu kama ‘Bodaboda’ walinufaika na mgomo huo kwani watu walilazimika kutumia vyombo hivyo vya usafiri.

Mwenyekiti wa Umoja wa Wasafirishaji Kilimanjaro na Arusha (Akiboa), Hussein Mrindoko alisema jana kuwa sababu ya mgomo huo ni faini kubwa wanazotozwa na askari wa Usalama Barabarani.
Chanzo ;Mwananchi