Wadau wa mawasiliano wajadili uzimaji analojia

WATAALAMU, wadau wa mawasiliano  na maofisa kutoka nchi 25 wanachama wa Jumuia ya Madola  wanakutana jijini hapa kwa siku nne kuanzia jana kujadili harakati za uzimaji wa mitambo ya analojia katika nchi zao na kuingia katika mfumo wa digitali.

Mkutano huo umeandaliwa kwa pamoja na Taasisi ya Jumuia ya Madola inayojihusisha na masuala ya mawasiliano, Mamlaka ya Mawasiliano Tanzania (TCRA) na Taasisi ya Mawasiliano kwa nchi za Afrika Mashariki (EACO).

Wakizungumza na waandishi wa habari jana kabla ya kuanza kwa mkutano huo, maofisa kutoka taasisi hizo tatu wenyeji wa mkutano huo, walisema mkutano huo ni muhimu kwa mataifa hayo ambapo yanalazimika kuzima mitambo ya analojia ifikapo Desemba mwakani.

Akizungumza katika mkutano huo, Katibu Mkuu wa Taasisi ya Mawasiliano Jumuia ya Madola, Profesa Tim Unwin, alisema lengo kuu la kuwakutanisha wadau wa sekta ya mawasiliano ni kuangalia changamoto mbalimbali zilizopo katika uzimaji wa mitambo ya analojia na jinsi ya kukabiliana nazo.

Mkurugenzi wa Utangazaji wa TCRA, Habbi Gunze, alisema Tanzania ambayo tayari awamu ya kwanza ya uzimaji mitambo imeishafanyika, kinachosubiriwa ni taarifa ya tume iliyoundwa kuchunguza changamoto zilizojitokeza katika awamu hiyo, ili zifanyiwe kazi na awamu ya pili iweze kutangazwa.

Alitaja baadhi ya changamoto ni uwepo wa ving’amuzi vichache kukidhi mahitaji na kupungua kwa matangazo ya biashara katika vituo vya luninga baada ya kuzima mitambo ya analojia.

Chanzo;Tanzania Daima

 

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.