WMA Enduimet yafanikiwa kutokomeza ujangili

WAKATI wimbi la ujangili wa meno ya tembo na pembe za faru likizidi kushika kasi nchini, Jumuiya ya Hifadhi ya Wanyamapori ya WMA Enduimet iliyopo Wilaya ya Longido, mkoani Arusha imefanikiwa kuzuia ujangili wa tembo kwa miaka mitatu mfululizo.

Tangu kuanzishwa kwa jumuiya hiyo hadi sasa hakuna tukio la ujangili wa tembo wala faru lililoripotiwa kutokana na jamii hiyo kuhamasika juu ya masuala ya uhifadhi, sanjari na kila mwanakijiji wa eneo hilo kuiona hifadhi hiyo kama sehemu ya ustawi wa maisha yake.

Ofisa tawala wa jumuiya hiyo, William Kuyan, alisema kinachowasaidia ni namna walivyojizatiti kwa kila mwanakijiji, katika kuzuia aina yoyote ya ujangili ndani ya hifadhi husika.

“Sio kwamba hakuna majangili, wapo wengi, tunawakamata kila siku kwenye doria zetu na tunawafikisha kwenye vyombo vya sheria,” alisema.

Akizungumza wakati wa doria ya kusaka majangili ndani ya hifadhi hiyo, Kamanda wa Kikosi cha Operesheni cha askari wa Hifadhi ya Jamii WMA Enduimet, John Magembe, alisema suala la uhifadhi wa wanyamapori linawezekana kama kila mwananchi atakubali, kujitolea na kuwa mwaminifu kwa uhifadhi huo na matokeo ya rasilimali zake.

Alisema siri ya mafanikio yao ni namna wanavyoshirikisha wanavijiji wenzao katika kuwezesha kupata taarifa za kila mgeni anayeingia kijijini hapo, lakini pia hufanya doria za miguu, mbwa wa kunusa, kutumia ndege maarufu kama ‘popobawa’ na zaidi hutumia watoa taarifa.

Kamanda wa Kikosi cha Mbwa, Lembris Kephas, alisema mbwa hao wana uwezo wa kumtambua jangili au yeyote aliyepita na kukanyaga ndani ya hifadhi kwa kutumia pua zao.

“Wakati wa doria tukigundua kuna nyayo za mtu amepita ndani ya hifadhi humsogeza mbwa huyo kwa ajili ya kunusa nyayo hiyo, na huyu mbwa ana uwezo wa kuhifadhi harufu hiyo kwa muda wa siku saba,” alisema Kephas.

Aliongeza kwa kusema baadaye wanapowashuku watuhumiwa au wanapowakamata majangili wakati wa gwaride la utambuzi, mbwa hao hupita kwenye miguu ya watuhumiwa hao na anapobaini uwiano wa harufu hupiga magoti au kukaa chini ya miguu ya mtuhumiwa kuashiria ndiye aliyekatisha kwenye hifadhi.

Chanzo;Tanzania Daima