Vyuo vya ufundi kutoa kozi zenye ithibati

  SERIKALI imetangaza kuwa kuanzia mwaka wa masomo 2014/15 vyuo vyote vya ufundi nchini vitaendesha mafunzo ya kozi zenye ithibati ili kuondoa usumbufu kwa wahitimu. Naibu Waziri wa Elimu na Mafunzo ya Ufundi, Philipo Mulugo, alitoa kauli hiyo alipofungua mkutano wa kitaifa wa wakuu wa vyuo vya ufundi nchini ulioandaliwa na Baraza la Taifa la Elimu ya Ufundi (NACTE) na kufanyika jijini hapa.

Pia alitangaza kuanza kwa mtaala wa Stashahada ya Elimu ya Msingi ambao utaanza kutekelezwa kwa vyuo vilivyo na sifa kuanzia mwaka wa masomo wa 2014/15 na kusistiza kuwa atalazimika kutumia polisi kukagua na kuvifunga vyuo ambavyo wamiliki wake wanashindwa kutekeleza masharti.

“Siku hizi kumeibuka wimbi kubwa la vyuo holela vinavyoendeshwa pasipo kuzingatia vigezo vilivyowekwa na NACTE. Jamii  imeendelea kuhujumiwa na watu wanaojitafutia fedha kwa njia za mkato, hasa wanaojitangaza kutoa elimu ya ufundi tena kwa ada ndogo,” alisema.

Aliwaasa wazazi na walezi kabla ya kuwapeleka watoto wao kujiunga na vyuo vya ufundi wahoji mambo muhimu ikiwa ni pamoja na usajili wa vyuo hivyo na taaluma za wakufunzi wake ili wawe na uhakika na taalum inayotolewa kwa watoto wao.

Aliliagiza baraza hilo ikiwa katika kutekeleza agizo hilo watakumbana na kikwazo chochote, ofisi yake itatoa ushirikiano kuhakikisha tatizo la kozi zisizotambuliwa linadhibitiwa.

Katibu Mtendaji wa NACTE, Dk. Primus Nkwera, alivitaka vyuo na taasisi za elimu za ufundi nchini zinazotoa mafunzo bila kusajiliwa pamoja na wale wote wenye nia ya kuanzisha vyuo vipya kuhakikisha vyuo vyao vinapata usajili kutoka baraza hilo kwa mujibu wa sheria.

“Baraza linapenda kuwasisitizia wadau wote ikiwamo wazazi, wanafunzi na umma kwa uiumla kujiunga na vyuo vilivyosajiliwa na Baraza na si vinginevyo,” alisema.

Alisema matarajio ya soko la ajira ni kuona vyuo vinatoa wahitimu wenye ujuzi na maarifa yanayokidhi viwango vya utendaji kazi katika taaluma husika.

Mwenyekiti wa NACTE, Mhandisi Steven Malote, alisema baraza hilo limeweka mfumo wa Tuzo za Kitaifa za Elimu ya Ufundi ambazo zimeunganishwa na Tuzo za Kitaifa za Ufundi Stadi (NVA), ili kuwa na ngazi kumi za Mfumo wa Kitaifa wa Elimu ya Ufundi na Ufundi Stadi (TVET).

Chanzo;Tanzani Daima