Vyuo vya Ufundi Jumuiya ya Madola kukutana Arusha

Arusha. Makamu wa Rais, Dk Mohamed Gharib Bilal, anatarajiwa kufungua  Mkutano wa Kimataifa wa Vyuo vilivyopo katika nchi za Jumuiya ya Madola Afrika vinavyotoa elimu na mafunzo ya ufundi (CAPA).

Mkuu wa Chuo cha Ufundi Arusha (ATC), Dk Richard Masika alisema jana kuwa, mkutano huo utakaofunguliwa kesho, utakuwa wa siku mbili na utafanyika kwenye Ukumbi wa Mikutano wa Kimataifa (AICC) uliopo mjini hapa.

Alisema, Tanzania imeteuliwa kuwa mwenyeji wa mkutano huu wa Novemba, 2013 na umeandaliwa na Taasisi  na  Chuo cha Ufundi Arusha (ATC), Chuo cha Usafirishaji Dar es Salaam (NIT) na Mamlaka ya Elimu na Mafunzo ya Ufundi Stadi (Veta).

Dk Masika alisema, umoja huo una jumla ya wanachama 173 ambao ni taasisi zinazotoa elimu na mafunzo ya ufundi kwa wanafunzi waliomaliza kidato cha nne na kuendelea katika nchi 18 za Afrika.

Aidha kauli mbiu katika mkutano huo ni  “Nafasi ya Elimu na Mafunzo ya Ufundi Afrika katika kuoanisha walichojifunza wahitimu (stadi) na mahitaji ya soko la ajira.

Dk Masika alisema, mkutano huo utajikita katika kujadili masuala mbalimbali  ya kuondoa tofauti kati ya mafunzo ya elimu ya ufundi na mahitaji ya soko la ajira pamoja na kutengeneza fursa za kukuza ajira kupitia Mfumo wa elimu wenye kuzingatia ujuzi na umahiri.

Pia mkutano huo utajadili changamoto ya mafunzo ya Elimu na Ufundi katika stadi zinazoibukia na kukuza ujasiriamali kwa maendeleo endelevu.

 Alifafanua zaidi kuwa, watajadili pia maswala ya utafiti, uvumbuzi na ubunifu katika kuhakikisha vyuo vya elimu na mafunzo ya ufundi vinakuwa endelevu.
Chanzo Mwananchi