Wanaharakati kumfikisha mahakamani Kagasheki

WANAHARAKATI wa haki za binadamu wanakusudia kumchukulia hatua za kisheria ikiwamo kumfikisha mahakamani, Waziri wa Maliasili na Utalii, Balozi Khamis Kagasheki, kutokana na agizo lake la kutaka watu watakaokamatwa kwa ujangili kuuawa.

Hatua ya kumburuta mahakamani Waziri Kagasheki inakuja wakati wanaharakati hao wakiwa wamemfungulia mashitaka Waziri Mkuu, Mizengo Pinda, kutokana na kauli yake ya kulitaka Jeshi la Polisi kuwatandika watu watakaokaidi amri ya polisi.

Katika mashambulizi hayo, wanaharakati hao wamemtaka ajiuzulu uwaziri kwa madai kuwa  kauli yake imetia aibu kwa serikali na haikupaswa kutolewa na kiongozi wa juu kama yeye.

Hayo yalisemwa jana kwa nyakati tofauti na Mkurugenzi Mtendaji wa asasi isiyo ya kiserikali ya kutetea wafugaji (PINGO’s), Edward Porokwa, na  Mkurugenzi Mtendaji wa Kituo cha Haki za Binadamu, (LHRC), Hellen Kijo-Bisimba.

Bisimba alisema kuwa mwendelezo wa kauli zinazovunja sheria za nchi zinazotolewa na viongozi ikiwemo ile ya Waziri Mkuu, Mizengo Pinda ya kutaka wasiotii maagizo ya Jeshi la Polisi wapigwe zitafanya nchi ishindwe kutawalika.

Alisema kuwa ni aibu kwa mtu mwenye wadhifa wa waziri kutoa kauli ya kutaka watuhumiwa wa ujangili wauawe kwa kile alichoeleza kuwa si kila anayekutwa kwenye hifadhi ni jangili.

Alisema kuwa kuna wengine wanaingia kuchunga mifugo au kukamata wanyama wadogo kwa ajili ya kitoweo, hivyo ni vema wakapelekwa kwenye vyombo vya sheria ili waweze kuthibitika kama ni majangili au la na si kuwaua.

Bisimba alisema kuwa kama Waziri Kagasheki anaona sheria za nchi zina matatizo ni vema akapeleka marekebisho ya sheria bungeni lakini si kutoa kauli za kuifanya nchi isifuate utawala wa sheria  huku akisisitiza kuwa kauli hiyo ni aibu kubwa kwa taifa.

Alisema kuwa kwa sasa wanajipanga ili kujua ni hatua gani za kuchukua kutokana na kauli hiyo ya Waziri Kagasheki aliyedai kuwa kwa nafasi yake angeweza kuviongezea uwezo vyombo vya ulinzi na usalama vinavyokabiliana na ujangili kwa kuvipa vifaa na teknolojia za kisasa za kukabiliana na majangili lakini si kuamrisha kuua watu.

Alisema kuwa kauli kama hiyo iliwahi kutolewa miaka kati ya 1996 na 1997 na aliyekuwa Waziri wa Maliasili, Juma Ngasongwa, ambapo  ilisababisha watu tisa waliokuwa wanaishi kuzunguka Hifadhi ya Taifa ya Serengeti  kupangwa mstari na kupigwa risasi wakidaiwa kuwa ni majangili, jambo ambalo halikuwa kweli.

Bisimba alisema kuwa  kati ya wale watu tisa, wawili hawakufa ndiyo wakatoa taarifa kwao, ambapo suala hilo walilipeleka mbele ya Tume ya Haki za Binadamu.

Hata hivyo aliweka wazi kuwa hakubaliani na vitendo vya ujangili vinavyoendeshwa na kuhatarisha uwepo wa tembo lakini akasema kuwa yeye anataka sheria za nchi zilifuatwe kwa majangili hao kukamatwa na kufikishwa kwenye vyombo vya sheria na si kuuawa.

Kwa upande wake Mkurugenzi wa Pingo’s, Porokwa, alisema kuwa ni vema Waziri Kagasheki akajiuzulu na aombe radhi kwa kauli yake ya kuchochea wananchi na vyombo vya usalama kuua watu.

“Hatupendi ujangili ila hili la waziri kuagiza watu wajichukulie sheria mkononi halikubaliki ni vema akajiuzulu, anaudharau muhimili wa mahakama kwa kigezo cha faini ndogo? Hii haikubaliki, yaani waziri aamue kutangaza watu wauawe?

“Mwenye mamlaka ya kutangaza hali ya hatari ni Rais ambaye ni amiri jeshi mkuu wa vikosi vya ulinzi na usalama lakini pia hana haki ya kusema watu wauawe hovyo tu,” alisema Porokwa.

Alisema kwa kuwa Kagasheki kajipambanua wazi kuwa yeye si mtetezi wa haki za binadamu pale alipowataka watetezi wa haki za binadamu wafunge midomo, hivyo ni vema akajiuzulu wadhifa alio nao ili nafasi hiyo ichukuliwe na mtu mwenye kusimamia na kuheshimu haki za binadamu ambaye atakuwa muumini wa utawala wa sheria .

Porokwa alisema kuwa kauli hiyo ya Kagasheki itasababisha mauaji kwa wananchi wasio na hatia wanaoishi kuzunguka hifadhi za taifa na kwamba kuna matukio ya wananchi wanaochunga mifugo pembezoni mwa hifadhi hizo kukamatwa na walinzi wa hifadhi na kusingiziwa kuwa wameingiza mifugo hivyo kulipishwa faini.

Alisema kwa kauli ya waziri wananchi hao watauawa wakidaiwa ni majangili, jambo alilodai kuwa ni hatari, ingawa alikiri kutokubaliana na ujangili unaohatarisha kutoweka kwa tembo.

Porokwa alisema kuwa ni vema wale watakaokamatwa wakifanya ujangili wakapewa haki ya kusikilizwa kwa kufikishwa kwenye vyombo vya sheria, ambavyo vina uwezo wa kuwahukumu kama wakithibitika ni majangili na si kuwaua.

Mwishoni mwa wiki Waziri Kagasheki akiwa jijini Arusha akiongea mara baada ya kuongoza matembezi ya kupinga mauaji ya tembo aliwataka wale watakaokutana na majangili kumalizana nao huko huko.

Chanzo: Tanzania Daima