LEMA ASHANGAA SERIKALI KUJIKOSESHA MAPATO

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

Mbunge wa Jimbo la Arusha Mjini (Chadema), Godbless Lema amedai uwezo wa Serikali kufikiri umefikia kikomo kutokana na kuweka alama za hatari maeneo ambayo yanaweza kutumika kuliingizia taifa fedha, huku ikiyaacha bila kuyaendeleza.

Akizungumza wakati akichangia mjadala wa Bajeti Kuu ya Serikali mwaka 2014/15, Lema alitoa mfano wa eneo la wazi lililopo mkoani Singida kwamba licha ya kuwa na upepo mkali unaoweza kuzalisha umeme, Serikali imeweka kibao kikielekeza magari yaende polepole kutokana na eneo hilo kuwa na upepo mkali.

Alisema mikoa ya Kanda ya Kati ni mikame kutokana na kuwa na kipindi kirefu cha jua kali kuliko mvua, lakini Serikali imeshindwa kuweka mitambo ya kuzalisha umeme wa jua.

“Nchi hii sijui tunakwenda wapi, Singida kuna upepo mkali ambao ungeweza kuzalisha umeme, sasa Serikali haijaweza kufanya hivyo.” alisema.

Alisema kuwa umeme unaozalishwa na nguvu ya jua (solar) unaweza kupatikana kwa akiwango kikubwa katika mikoa ya Kanda ya Kati, lakini licha ya Serikali kulitambua hilo imeshindwa kuzalisha umeme huo.

“Ndiyo maana niliwahi kusema kuwa Serikali hii imefikia mwisho wa kufikiri, ukitaka kuamini hilo tizama katika vyanzo vya mapato, kila mwaka ni vilevile vya soda, bia, sigara na pombe kali” alisema

Mbunge huyo aliitaka Serikali kuhakikisha kuwa inazingatia ushauri inaopewa na watu wa kada mbalimbali, kuachana na tabia ya kuogopa kusaidia jimbo fulani kwasababu tu linaongozwa na mbunge wa upinzani.

Chanzo:Mwananchi