MAWAKILI KESI YA MWALE WAJAJUU

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

MAWAKILI wa utetezi kwenye shauri la utakatishaji fedha linalowakabili washitakiwa wanne akiwemo wakili maarufu, jijini hapa, Median Mwale, wameibua hoja juu ya uhalali wa kutumika kwa sheria ya kuzuia utakatishaji fedha.

Hoja hiyo nzito kisheria inaeleza kwamba sheria hiyo haifai kutumika kwa sababu haijatangazwa kwenye gazeti la serikali baada ya kusainiwa na rais.

Mbali ya Mwale, washitakiwa wengine katika kesi hiyo ni Elius Ndenjembi, Don Bosco Gichana na Bonifasi Mimbwa.

Waliwalalamikia wateja wao kufunguliwa mashitaka kwa kutumia sheria zilizoidhinishwa kuanza kutumika baada ya wao kukamatwa jambo walilodai ni kinyume cha sheria.

Mawakili hao pia wamelalamikia ucheleweshwaji wa makusudi wa kuanza kusikilizwa kwa shauri hilo unaofanywa na upande wa serikali kwa kigezo cha upelelezi haujakamilika, huku wateja wao wakiendelea kuteseka rumande kwa miaka mitatu sasa.

Hayo yalisemwa mwishoni mwa wiki na wakili wa utetezi, Omary Iddi Omary, mbele ya Hakimu Mkazi Mfawidhi, Devota Kamuzora.

Wakili huyo anashirikiana na mawakili Mosses Mahuna na Modest Akida, huku upande wa serikali ukiwakilishwa na wakili, Tumaini Kweka.

Waliiomba mahakama hiyo iridhie ombi lao la kupeleka mkanganyiko huo wa kisheria Mahakama Kuu ili ukapatiwe tafsiri ya kisheria ikiwemo uhalali wa sheria hiyo waliyodai kuwa mchakato wake una upungufu kwa kuwa haujatangazwa kwenye gazeti la serikali baada ya rais kuisaini ili ianze kutumika.

“Sheria hiyo iliwekwa kwenye gazeti la serikali Januari 12, 2006 kabla ya kusainiwa na Rais Jakaya Kikwete Januari 15, 2007 ukiangalia tarehe hizo mbili utaona ilitangazwa kabla rais hajaisaini kuiridhia na baada ya kusainiwa haijatangazwa ili ianze kutumika hivyo sheria hii haiwezi kuwa halali kutumika hadi itakapotangazwa.

“Mheshimiwa hakimu, kutokana na ukiukwaji wa taratibu hizo, unafanya sheria ya uzuiaji utakasaji wa fedha haramu ya mwaka 2006 isiwepo, hii ina maana hata washtakiwa  hawa wanashikiliwa kwa kutumia sheria ambayo haipo.

“Hata kosa wanaloshitakiwa nalo halipo kwenye sheria za sasa, katika mazingira hayo hakuna shaka kuwa hapa hakuna mashtaka sahihi,” alisema wakili Omary.

Wakili huyo aliieleza mahakama kwamba wateja wake wameshitakiwa kwa kosa la kula njama kutenda kosa kinyume cha sheria huku kwenye maelezo ya kosa ikitumiwa sheria nyingine ambapo wanadaiwa kukiuka sheria ya uzuaji utakasaji fedha ya mwaka 2006 jambo alilodai kuwa linakiuka sheria ya uendeshaji mashauri ya jinai (CPA).

Akijibu hoja hizo wakili wa serikali, Kweka alidai hazina msingi kwa kuwa sheria hutumika baada ya kupitishwa na Bunge na kuwa imefuata michakato yote ndipo huanza kutumika.

“Nafikiri wameleta malalamiko kwenye eneo lisilo sahihi, kwani hata kwa mujibu wa uanzishwaji wa mahakama hii sidhani kama wewe (hakimu) unaweza kuamua mashauri ya Manyara, hii ni sawa na kumtuma mtoto akachukue chakula cha mlinzi,” alisema wakili Kweka jambo lilomfanya hakimu kuingilia kati na kumtaka afute kauli yake ya kumfananisha yeye na mlinzi.

Baada ya malumbano ya kisheria, hakimu Kamuzora aliahirisha shauri hilo hadi Mei 12, mwaka huu kwa ajili ya kutoa uamuzi mdogo.

Chanzo:Tanzania Daima