Balozi Seif aipongeza NHIF

MAKAMU wa Pili wa Rais Zanzibar, Balozi Seif Ali Idd, ameupongeza Mfuko wa Taifa wa Bima ya Afya (NHIF) kwa kutoa bure huduma za upimaji wa afya kwa wananchi.

Pongezi hizo alizitoa hivi karibuni baada ya kupata maelezo ya utendaji wa mfuko huo kutoka kwa Meneja wa NHIF Arusha, Anicia Ng’weshemi, wakati wa maadhimisho ya miaka 50 ya Chuo cha Maendeleo Tengeru.

“Kazi mnayoifanya ni nzuri kwani matatizo kama sukari, shinikizo la damu na uzito uliozidi yamekuwa tishio, hivyo mmefanya kazi nzuri… hongereni sana,” alisema Balozi Iddi aliyekuwa mgeni rasmi wakati wa kufunga maonyesho hayo.

Katika maonyesho hayo zaidi ya watu 600 walipata huduma za kupima magonjwa yasiyoambukizwa sambamba na elimu ya kujikinga nayo.

NHIF imetoa huduma za kupima afya kwenye maeneo mbalimbali ya nchi kwa lengo la kuwasaidia wananchi kufahamu afya zao na kuwapa ushauri wa kitaalamu.

Mbali na huduma za upimaji, NHIF pia ilikuwa na dawati la elimu kwa umma ambalo kazi yake ilikuwa kutoa elimu kuhusu umuhimu wa kujiunga na mfuko huo, Mfuko wa Afya ya Jamii (CHF) na Tiba kwa Kadi (TIKA).

Wakizungumza katika banda la mfuko huo, wanachama na wananchi wengine waliofika kwa lengo la kupata huduma walieleza kufurahia huduma hizo na kusema ni mkombozi kwa wananchi hasa kipindi hiki ambacho gharama za matibabu ni kubwa.

Akitoa ushauri kwa wananchi, Ofisa Udhibiti Ubora wa NHIF, Dk. Peter Nyakubega, alisema ni vema wananchi kuwa na utamaduni wa kupima afya zao mara kwa mara, hali itakayowasaidia kujitambua

Chanzo;Tanzania Daima