Wataka watuhumiwa wafikishwe mahakamani

Arusha. Mtandao wa Mashirika ya Wafugaji (Pingos Forums) umependekeza kufikishwa mahakamani kwa mawaziri wanne ambao uteuzi wao umetenguliwa na Rais Jakaya Kikwete kutokana na kashfa ya Operesheni Tokomeza Ujangili.

Pia, wamependekeza kufikishwa mahakamani viongozi wote wakuu waliokuwa wakishirikiana na mawaziri hao katika ngazi za uamuzi.

Akizungumza na waandishi wa habari jana Mkurugenzi Mtendaji wa PINGO’s Forum, Edward Porokwa alisema wanaipongeza Kamati ya Bunge ya Ardhi, Maliasili na Mazingira kwa kufanya kazi kwa uadilifu na uzalendo, lakini akasema kung’olewa kwa mawaziri hao hakutoshi.

“Tunapendekeza baada ya kuundwa Tume ya Kimahakama, iwahoji tena mawaziri walioondolewa Dk Emmanuel Nchimbi, Dk Mathayo David, Shamsi Vuai Nahodha na Balozi Khamis Kagasheki,” alisema Porokwa.

Porokwa alisema ofisi yake iko tayari kushirikiana na tume ya kimahakama, kuwaunganisha na wafugaji walioporwa mifugo, waliobakwa na waliojeruhiwa.

“Tunaamini kamati (ya Bunge), imefanya kazi nzuri sana na taarifa yao ina ushahidi hadi wa simu zilizotumika kutumwa fedha za rushwa. Huu tunaamini ni mwanzo tu wa kutambua maovu, mauaji, ubakaji na mateso waliopata wafugaji,” alisema Porokwa.

Alisema wanatarajia wafugaji na wananchi wengine walioathirika na operesheni hiyo, watalipwa fidia stahiki.

Ofisa Miradi wa Shirika hilo, Isaya Naini alisema Operesheni Tokomeza imevuruga uhusiano wa muda mrefu baina ya wafugaji na hifadhi, kwani mamia ya wafugaji ambao ni walinzi wa hifadhi wameathirika

Chanzo;Mwananchi